على رجلي دم .. نظرت له ما إحتملت
على إيدي دم.. سألت ليه ؟ لم وصلت
على كتفي دم.. و حتى على راسي دم
أنا كُلّي دم .. قَتَلت ؟ ..... واللا إتقتلت
عجبي !!
:::::::::::::::::::
أنا كل يوم أسمع .... فُلان عذبوه
أسرح في بغداد و الجزاير وأتوه
ما أعجبش م اللي يطيق بجسمه العذاب
و أعجب من اللي يطيق يعذب أخوه
عجبي !!!
:::::::::::::::
ينبوع و في الحواديت أنا سمعت عنه
إنه عجيب .. و ف وسط لهاليب لكنه
شقيت كما الفرسان طريقي .. لاقيت
حتى الخنازير و الكلاب شربوا منه
عجبي !!!
::::::::::::::::
يا قرص شمس ما لُهش قُبة سما
يا ورد من غير أرض شَبّْ و نما
يا أي معنى جميل سمعنا عليه
الخلق ليه عايشين حياه مؤلمه؟
عجبي !!!
:::::::::::::::
شاف الطبيب جرحي وصف له الأمل
وعطاني منه مقام يا دوب ما إندمل
مجروح جديد يا طبيب و جرحي لهيب
ودواك فرغ مني .... و إيه العمل
عجبي !!!
::::::::::::::
أعرف عيون هي الجمال و الحسن
و أعرف عيون تاخد القلوب بالحضن
و عيون مُخيفه و قاسيه وعيون كتير
وبحس فيهم كلهم بالحزن
عجبي !!
:::::::::::::::
إيش تطلبي يا نفس فوق كل ده
حظك بيضحك و إنتي متنكده
ردت قالت لي النفس : قول للبشر
ما يبصوليش بعيون حزينه كده
عجبي !!
::::::::::::::::
|