لما الساعه تدق 12 بيبتدى يوم جديد
اللى بالنسبه له حزن واللى بالنسبه له عيد
يعنى الدنيا هى هى والزمن هو الشهيد
يعنى كل حاجه واضحه خللى إرادتك من حديد
هحكيلكوا حكاية واحد كان أقرب صاحب ليه
الدنيا والأيام مكتش معاه هيه
كان حلمه يعمل حاجه وبيكره الأذيه
لكن الدنيا مبترحمش والناس كلها ملهيه
لما ابتدى يبان عليه إنه عيان شويه
أهله مهتموش وقالولوا روح اشرب ميه
المشكله مكتش سهله دى كانت قضيه
كان عنده مرض جامد والأعراض كانت مخفيه
لما رحت سألت عليه قالولى بيعمل عمليه
لما رحت تانى يوم قالولى إتأخرت شويه
وف حياتك البقيه
طوف وشوف تلقى الألوف واقفين صفوف والدور علينا
طوف وشوف تلقى الألوف حاسين بخوف عشنا فى ماضينا
القسوه فى التربيه بتولد الإنحراف
مبتكلمش على نفسى اصل أهلى كانوا لطاف
كان عندى واحده أعرفها من أهلها كنت بخاف
أصل دايما كان بينهم ميت خلاف
وفاتت سنين كتير وقابلتها فى الشارع
كان شكلها متغير ولبسها كان خالع
قالتلى أنا سبت البيت بقالى سنتين
وقاعده عند أصحابى فى المهندسين
قلتلها والجامعه والدراسه راحوا فين
قالتلى مش مهم هبقى أفكر بعدين
هبقى أفكر بعدين
طوف وشوف تلقى الألوف واقفين صفوف والدور علينا
طوف وشوف تلقى الألوف حاسين بخوف عشنا فى ماضينا
مش عارف أبتدى منين
فى قصة حسنين
كان عنده أخ واحد وأهله منفصلين
بيقولوا كان متدلع أصله آخر العنقود
وعنده فلوس كتير والصرف ملوش حدود
لحد ما جه اليوم اللى أبوه مات فيه
وبان كره أخوه اللى كان مخبيه
قال عليه مجنون لازم يخش مصحه
كان همه بس يورث ومبادئه دبحها
والباقى أكيد معروف
مش محتاج كلام وحروف
الدنيا بقت غابه والغريب بقى شئ مألوف
ولسه يا ما هنشوف
طوف وشوف تلقى الألوف واقفين صفوف والدور علينا
طوف وشوف تلقى الألوف حاسين بخوف عشنا فى ماضينا
دى أغنية راب ل كريم نجيب
عجبنى كلامها أوى قلت أكتبهلكم
الأغانى الراب المصريه والعربيه حلوه جدا وهادفه جدا
ياريت تحاولوا تسمعوها
وانا كل ما الاقى أغنيه راب كويسه وكلامها هادف هجيبلكم كلماتها
قولولى ايه رأيكم فى الأغنيه؟؟
