ميت ألف فرصه عشان أسيب مصر

[karmen]

ميت ألف فرصة عشان أسيب مصر... ولا عمري سبتها


علشان هي بلادي... إللي بجد بحبها


بحبها بكدبها وصدقها


بحب فيها أصالة وندالة أهلها


بحب فيها السهر


بحب زيفها وأصلها


بحب فيها طلعة الشمس... تنور وشها


بحب فيها القمر... طالع يغازل حسنها


بحب فيها المشي... على شط نيلها وبحرها


بحب فيها بناتها... راسمين ملامح شعبها


دي بنت مايصه... وحاطه ورده فـ شعرها


ودي بنت جد... ونازله جري لشغلها


هتلاقي فين بلد فيها الكنايس والجوامع.... بتحضن بعضها


مسلم مسيحي... إخوات راضعين طيبة من صدرها


نبع الحنان... ويناموا حاضنين أرضها


هتلاقي فين تاني... بلد كل حاجه فيها تخليك تحبها


هتقولي ظالمه... هقولك برضو بحبها


هتقولي ضالمه... ما هو ده سواد شعرها


هتقولي زحمه... هقولك علشان بنعشق أرضها


هتقولي فيها فساد... هقولك ده من طيبة شعبها


جرب كده تسهر ولو وحدك على ضف نيلها... وحبها


جرب تشوف بنت حلوه مع صحبتها جمبها بتحبها... شايلة في قلبها هموم الدنيا كلها... وبرضو بتحبها


جرب كده تاكل دره وترمس على شطها... وتشوف وشوش الناس واضحك زيها


طب وانت ماشي لوحدك ووقعت في مشكله... مش بتلاقي ألف واحد جمبك بيحلها... لا تعرفهم ولا يعرفوك بس جمعكم حبها


أهي هي دي مصر...


زاحمه ظالمه...


فاسده ضالمه...


مش مهم...


ده كفايه خفت دمها...


هأفضل لمصر أقول وأعيد...


أنا أصلي عاشق أرضها...


وطبعا ده كله كلام في الهوا...


أنا لو تجيني نص فرصة هقول لها...


بالسلامه يا مصر...


ومش عايز أشوف وشها...


وهي دي بقى ندالة أهلها...



منقول

[بلابل]

هتقولي فيها فساد... هقولك ده من طيبة شعبها

موضوع رائع يا كارمن

وبجد فيها كلام جامد جدا

تسلم ايدك

[radwan]

انتى مين فيهم
هتسيبيها ولا هتفضلى فيها؟

ارسى على حاجة

[golden man]

يا رضوان بتقولك نص فرصه حتى ما جتش فرصه كامله
ولو فرصه بسمسم حتى
دى ندالة اهلها
هههههههههههههههههههههه
تسلمى يا كااااااااااارمن

[karmen]

ميرسى ليك بلابل على المرور
مشكور

[karmen]

انتى مين فيهم
هتسيبيها ولا هتفضلى فيها؟

ارسى على حاجة

لما انت تبقى ترسى الأول
عامة أنا بنت هسيبها ليه
الدور والباقى عليكم انتوا يا شباب مصر

[karmen]

يا رضوان بتقولك نص فرصه حتى ما جتش فرصه كامله
ولو فرصه بسمسم حتى
دى ندالة اهلها
هههههههههههههههههههههه
تسلمى يا كااااااااااارمن

أه فعلا دى ندالة أهلها
بعد ما يقعدوا يحكوا ويتحاكوا عن مصر
ويقولوا فيها أشعار
أول ما تجيلهم الفرصه يضربوا مصر واللى جابوا مصر بالجزمه
متشكرين يا مان عالمرور

[radwan]

لما انت تبقى ترسى الأول
عامة أنا بنت هسيبها ليه
الدور والباقى عليكم انتوا يا شباب مصر

انا مقولتش انى هسيبها
مصر دى عمرى حياتى حبى
مهما عملت فيا ومهما حصلى فيها
عمرى كله فداها

[عمر-غانم]

أنا أصلاً سايب مصر وقاعد فى السعودية
زهقت من السعودية وعايز أروح مصر لأن عندى فى مصر بس
أصحاب والواحد زهق من الغربة
,بس انا كنت روحت السعودية علشان زهقان من مصر
وكان نفسى اديها بال..........
موضوع رائع يا كارمن
تسلمى

[Silver]

بحب فيها أصالة وندالة أهلها

حلوة والله الكلام ده

أصالة وندالة أهلها

تيجى ازاى بس

ومابتصدقى نص فرصة واسيبها

بعد كل الكلام الحلو اللى فى الاول

تيجى تقولى هاسيبها وكمان نص فرصة

[karmen]

حلوة والله الكلام ده

أصالة وندالة أهلها

تيجى ازاى بس

ومابتصدقى نص فرصة واسيبها

بعد كل الكلام الحلو اللى فى الاول

تيجى تقولى هاسيبها وكمان نص فرصة



ياريت تركزه حبه
هو انتوا مدرستوش نحو وبلاغه قبل كده
موضوع نص فرصه ده وبعديه وهى دى بقى ندالة اهلها بتوضح فكره معينه اكيد كلكم فاهمينها
اما بالنسبه لأصالة وندالة ده تضاد يوضح المعنى ويبرزه
الظاهر دراسة العلوم نستك لغتك العربيه
شكرا رامى باشا على المرور

[golden man]

هههههههههههههههههههههههههههه
احنا دخلنا فى النحو البلاغه والادب والكلام ده
ده لعبتى بقى وسع وسع
هههههههههههههههههههههههههههه
خفى علينا شويه يا كارمن

[هيمة فرج]

هتقولي ظالمه... هقولك برضو بحبها


هتقولي ضالمه... ما هو ده سواد شعرها


هتقولي زحمه... هقولك علشان بنعشق أرضها


هتقولي فيها فساد... هقولك ده من طيبة شعبها


جرب كده تسهر ولو وحدك على ضف نيلها... وحبها


جرب تشوف بنت حلوه مع صحبتها جمبها بتحبها... شايلة في قلبها هموم الدنيا كلها... وبرضو بتحبها


جرب كده تاكل دره وترمس على شطها... وتشوف وشوش الناس واضحك زيها


دى ام الدنيا

[karmen]

ميرسى ليك يا هيمه على المرور