كل ما كتب صلاح جاهين من رباعيات وأشعار (موضوع متجدد)

[karmen]

نبذة عن الشاعر
http://www.adab.com/photos/salah3.jpg

• اسمه الحقيقي محمد صلاح الدين بهجت أحمد حلمي

• ولد في 25 ديسمبر 1930 فى شارع جميل باشا بحي شبرا.

• والده المستشار بهجت حلمي الذي تدرج في السلك القضائي بدءًا من وكيل نيابة حتى عُين رئيساً لمحكمة استئناف المنصورة.

• التحق بكلية الحقوق بناء على رغبة والده، ودرس في ذات الوقت في كلية الفنون الجميلة دون علم والده لفترة قصيرة، ثم ترك الدراسة بأكملها وانغمس في العمل الصحفي.

• التحق بروز اليوسف وعمل سكرتير تحرير وظل يرسم بشكل سري إلى أن اكتشفه "أحمد بهاء الدين" -الرجل الثاني بالمجلة وقتها- فأفرد له صفحة كاملة أسبوعيا.

• كتب عددا كبيرا من الأغاني الوطنية وارتبط اسمه بثورة يوليو ومغنيها "عبد الحليم حافظ" وذاعت شهرته من خلال بعض الأغاني مثل "صورة" "السد العالي" وغيرهما.

• كتب السيناريو والحوار لعدة أفلام ‏مثل "خلّي بالك من زوزو"، "أميرة حبي أنا"، "شفيقة ومتولي" و"المتوحشة" كما شارك في إنتاج أفلام "أميرة حبي أنا"، "عودة الابن الضال"، وشارك بالتمثيل في عدة أفلام منها "شهيد الحب الإلهي" عام 62 و"لا وقت للحب" عام 63 و"المماليك" في عام 1965.

• توفي في 21 أبريل عام 1986.

,,,,,,,,,,,,,,,,,,,,,,,,,

خرج إبن آدم مـ العدم قلت : ياه
رجع إبن آدم للعدم قلت : ياه
تراب بيحيا ... وحي بيصير تراب
الأصل هو الموت و اللا الحياه ؟
عجبي !!!


::::::::::::::::::
ضريح رُخام فيه السعيد إندفن
و حفره فيها الشريد من غير كفن
مريت عليهم .. قلت يا للعجب
لإتنين ريحتهم ليها نفس العفن
عجبي !!!

:::::::::::::::::
ياما صادفت صُحاب و ما صاحبتهُمش
و كاسات خمور و شراب و ما شربتهُمش
أندم على الفرص اللي أنا سبتهم
و اللا على الفرص اللي ما سبتهمش
عجبي !!

:::::::::::::::::::
الكون ده كيف موجود من غير حدود
و فيه عقارب ليه و تعابين ودود
عالم مجرب فات و قال سلامات
ده ياما فيه سؤالات من غير ردود
عجبي !!!

:::::::::::::::::::
أنا شاب لكن عُمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي !!!

::::::::::::::
يا باب يا مقفول ... إمتى الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول
عجبي !!!
:::::::::::::::::
أحب أعيش ولو في الغابات
أصحى كما ولدتني أمي و أبات
طائر .. حيوان.. حشره .. بشر ..بس أعيش
محلا الحياة.. حتي في هيئة نبات
عجبي !!
:::::::::::::::::

[karmen]

عجبتني كلمه من كلام الورق
النور شَرَق من بين حروفها و بَرَق
حبيت أشيلها ف قلبي .. قالت حرام
ده أنا كل قلب دخلت فيه إتحرق
عجبي !!!
::::::::::::::::
كان فيه زمان سحليه طول فرسخين
كهفين عيونها و خشمها بربخين
ماتت لكن الرعب لم عمره مات
مع إنه فات بدل التاريخ تاريخين
عجبي !!
:::::::::::::::::::::
رقبة إزازه و قلبي فيها إنحشر
شربت كاس و إتنين و خامس عشر
صاحبت ناس م الخمره تصبح وحوش
و صاحبت ناس م الخمره تصبح بشر
عجبي !!!
::::::::::::::::
سَهيّر ليالي و ياما لفيت و طُفت
و ف ليله راجع في الضلام قمت شفت
الخوف ... كأنه كلب سد الطريق
و كنت عاوز أقتله .. بس خفت
عجبي !!
:::::::::::::::
ورا كل شباك ألف عين مفتوحين
و أنا وإنتي ماشيين يا غرامي الحزين
لو إلتصقنا نموت بضربة حجر
و لو إفترقنا نموت متحسرين
عجبي !!!
::::::::::::::
نوح راح لحاله والطوفان إستمر
مركبنا تايهه ولسه مش لاقيه بر
آه م الطوفان وآهين عليك يا بر
إزاي تقدر تبان والدنيا غرقانه شر
عجبي !!
:::::::::::::::::

[karmen]

على رجلي دم .. نظرت له ما إحتملت
على إيدي دم.. سألت ليه ؟ لم وصلت
على كتفي دم.. و حتى على راسي دم
أنا كُلّي دم .. قَتَلت ؟ ..... واللا إتقتلت
عجبي !!
:::::::::::::::::::
أنا كل يوم أسمع .... فُلان عذبوه
أسرح في بغداد و الجزاير وأتوه
ما أعجبش م اللي يطيق بجسمه العذاب
و أعجب من اللي يطيق يعذب أخوه
عجبي !!!
:::::::::::::::
ينبوع و في الحواديت أنا سمعت عنه
إنه عجيب .. و ف وسط لهاليب لكنه
شقيت كما الفرسان طريقي .. لاقيت
حتى الخنازير و الكلاب شربوا منه
عجبي !!!
::::::::::::::::
يا قرص شمس ما لُهش قُبة سما
يا ورد من غير أرض شَبّْ و نما
يا أي معنى جميل سمعنا عليه
الخلق ليه عايشين حياه مؤلمه؟
عجبي !!!
:::::::::::::::
شاف الطبيب جرحي وصف له الأمل
وعطاني منه مقام يا دوب ما إندمل
مجروح جديد يا طبيب و جرحي لهيب
ودواك فرغ مني .... و إيه العمل
عجبي !!!
::::::::::::::
أعرف عيون هي الجمال و الحسن
و أعرف عيون تاخد القلوب بالحضن
و عيون مُخيفه و قاسيه وعيون كتير
وبحس فيهم كلهم بالحزن
عجبي !!
:::::::::::::::
إيش تطلبي يا نفس فوق كل ده
حظك بيضحك و إنتي متنكده
ردت قالت لي النفس : قول للبشر
ما يبصوليش بعيون حزينه كده
عجبي !!
::::::::::::::::

[karmen]

إقلع غماك يا تور وإرفض تلف
إكسر تروس الساقيه و إشتم وتف
قال : بس خطوه كمان .. وخطوه كمان
يا أوصل نهاية السكه يا البير تجف
عجبي !!
:::::::::::::::::::
يا حزين يا قُمقُم تحت بحر الضياع
حزين أنا زيك و إيه مُستطاع
الحزن ما بقالهوش جلال يا جدع
الحزن زي البرد ... زي الصُداع
عجبي !!
:::::::::::::
الفيلسوف قاعد يفكر سيبوه
لا تعملوه سلطان و لا تصلبوه
ما تعرفوش إن الفلاسفه يا هوه
اللي يقولوه بيرجعوا يكدبوه
عجبي !!!
::::::::::::::
على بُعد مليون ميل من أرضنا
من الفراغ الكوني بصيت أنا
لا شُفت فرق بين جبال و بحور
و لا شُفت فرق ما بين عذاب أو هنا
عجبي !!
::::::::::::::::
إنسان أيا إنسان ما أجهلك
ما أتفهك في الكون و ما أضألك
شمس وقمر و سدوم و ملايين نجوم
و فاكرها يا موهوم مخلوقه لك
عجبي !!
::::::::::::::
نظرت فوق للنجوم و أنا ساير
رجليا عترت في الحُفر و الحجاير
بقيت أقول و أنا ع التراب: يا سلام
مش بس عبره أخدت لكن عباير
عجبي !!!
:::::::::::::::
يا نجم .. نورك ليه كده بيرتجف ؟
هو إنت قنديل زيت ؟ أو تختلف
أنا نجم عالي .. بس عالي قوي
و كل ما أنظر تحت أخاف أنحدف
عجبي !!
:::::::::::::::

[karmen]

في يوم صحيت شاعر براحه و صفا
الهم زال و الحزن راح و إختفى
خدني العجب و سألت روحي سؤال
أنا مُت ؟ و لا وصلت للفلسفه
عجبي !!
:::::::::::::::
السم لو كان في الدوا منين يضُر ؟
و الموت لو عدونا .. منين يسُر؟
حُط القلم في الحبر و إكتب كمان
و العبد للشهوات ..منين هو حر؟
عجبي !!
:::::::::::::::
وقفت بين شطين على قنطره
الكدب فين و الصدق فين يا ترى
محتار هموت ..الحوت خرج لي وقاللي
هو الكلام يتقاس بالمسطره
عجبي !!
::::::::::::::
سرداب في مُستشفى الولاده طويل
صرخات عذاب ورا كل باب وعويل
وفي الطريق متزوقين البنات
متزوقين للحب و المواويل
عجبي !!
:::::::::::::::
الدنيا أوضه كبيره للإنتظار
فيها إبن آدم زيه زي الحُمار
الهمّ واحد ..و الملل مُشترك
و مفيش حمار بيحاول الإنتحار
عجبي !!
::::::::::::::

أيوب رماه البين بكل العلل
سبع سنين مرضان وعنده شلل
الصبر طيب ..صبر أيوب شفاه
بس الأكاده مات بفعل الملل
عجبي !!
::::::::::::::

[karmen]

نسمة ربيع لكن بتكوي الوشوش
طيور جميله بس من غير عشوش
قلوب بتخفق إنما وحدها
هي الحياه كده ..كلها في الفاشوش
عجبي !!
:::::::::::::::
يا طير يا عالي في السما طُظ فيك
ما تفتكرشي ربنا مصطفيك
برضَك بتاكل دود و للطين تعود
تمُص فيه يا حلو ..و يمُص فيك
عجبي !!
::::::::::::::
كروان جريح مضروب شُعاع م القمر
سقط من السموات فؤاده إنكسر
جريّت عليه قُطه عشان تبلعه
أتاريه خيال شعرا و مالوش أثر
عجبي !!
:::::::::::::::
ياللي نصحت الناس بشُرب النبيت
مع بنت حلوه وعود وضحك وحديت
مش كنت تنصحهم منين يكسبوا
تمن ده كله ؟ ..و اللا يمكن نسيت
عجبي !!
::::::::::::::
ما حدّْ في الدنيا واخد جزاته
و لا حد بيفكر في غير لذاذاته
ما تعرفيش يا حبيبتي .أنا و إنتي مين؟
إنتي عروس النيل ..و أنا النيل بذاته
عجبي !!
::::::::::::::
رقاصه خرسا و رقصه من غير نغــم
دنيا ..يا مين يصالحها قبل الندم
ساعتين تهز بوجهها يعني
يترجرجوا نهديها يعني نعم
عجبي !!
::::::::::::::
إخطفني ياللي تحبني ع الحصان
الدنيا قالت يوم في ماضي الزمان
إخطفني ياللي تحبني ع الفرس
الدنيا قالت ..قام خطفها الشيطان
عجبي !!
::::::::::::::::

[karmen]

من بين شقوق الشيش و شقشقت لك
مع شهقة العصافير و زقزقت لك
نهار جديد أنا ..قوم نشوف نعمل إيه
أنا قلت يا هتقتلني .. يا هقتلك
عجبي !!
:::::::::::::::
جالك أوان ووقفت موقف وجود
يا تجود بده يا قلبي يا بده تجود
ما حد يقدر يبقى على كل شئ
مع إن – عجبي – كل شئ موجود
عجبي !!
:::::::::::::::
جالك أوان وعرفت مشي الجنايز
كيف شفتها يا عبد رب اللذايذ
قال :شفت شيل بالحيل فقير أو أمير
كما شالوا في الخمامير فواضي القزايز
عجبي !!
:::::::::::::::
أنا كنت شئ و صبحت شئ ثم شــئ
شوف ربنا ..قادر على كل شئ
هز الشجر شواشيه ووشوشني قال :
لابد ما يموت شئ عشان يحيا شئ
عجبي !!
:::::::::::::::
كيف شفت قلبي و النبي يا طبيب
همد و مات و اللا سامع له دبيب
قاللي لاقيته مختنق بالدموع
و مالوش دوا غير لمسه من إيد حبيب
عجبي !!
::::::::::::::

تسلم يا غُصن الخوخ يا عود الحطب
بييجي الربيع..تطلع زهورك عجب
و أنا ليه بيمضي ربيع وييجي ربيع
و لسه برضَك قلبي حتة خشب
عجبي !!
::::::::::::::
قلبي عليل يا ناس و في الكاس دواه
مديت له إيدي شربت مـ اللي حواه
جنبي الشمال خف..اليمين إتوجع
و إيه يداوي الكبد مـ اللي كواه
عجبي!!
:::::::::::::::

[karmen]

يا مشرط الجراح أمانه عليك
و إنت فـ حشايا تبص من حواليك
فيه نقطه سوده في قلبي بدأت تبان
شيلها كمان..والفضل يرجع إليك
عجبي !!
::::::::::::::::::::
دي مذكرات وكتبتها من سنين
في نوته زرقا لون بحور الحنين
عترت فيها..رميتها في المُهملات
وقلت صحيح أما صحيح كلام مخبولين
عجبي !!
::::::::::::::::::
دخل الشتا وقفل البيبان ع البيوت
وجعل شُعاع الشمس خيط عنكبوت
وحاجات كتير بتموت في ليل الشــتا
لكن حاجات أكتر بترفض تموت
عجبي !!
::::::::::::::
سمعت نقطة ميه جوه المحيط
بتقول لنقطه ما تنزليش في الغويط
أخاف عليكي م الغرق..قُلت أنا
ده اللي يخاف م الوعد يبقى عبيط
عجبي !!
:::::::::::::::
بحر الحياه مليان بغرقى الحياه
صَرَخت خَش الموج في حلقي ملاه
قارب نجاه .. صرخت قالوا مفيش
غير بس هو الحب قارب نجاه
عجبي !!
:::::::::::::::
فارس وحيد جوه الدروع الحديد
رفرف عليه عصفور وقال له نشيد
منين ..منين..و لفين لفين يا جدع
قال من بعيد و لسه رايح بعيد
عجبي !!
:::::::::::::::
كان فيه قمر كأنه فرخ الحمام
على صغره دق شعاع شق الغمام
أنا كنت حاضر قلت له ينصرك
إش حال لما هتبقى بدر التمام
عجبي !!
:::::::::::::::

[karmen]

النهد زي الفهد نط إندلع
قلبي إنهبش بين الضلوع و إنخلع
ياللي نهيت البنت عن فعلها
قول للطبيعه كمان تبطل دلع
عجبي !!
:::::::::::::::
صوتك يا بنت الإيه كأنه بدن
يرقص يزيح الهم يمحي الشجن
يا حلوتي و بدنك كأنه كلام
كلام فلاسفه سكروا نسيوا الزمن
عجبي !!
::::::::::::::::
كُرباج سعاده وقلبي منه إنجلد
رمح كأنه حصان و لفّ البلد
و رجع لي نُص الليل و سألني..ليه؟
خجلان تقول إنك سعيد يا ولد
عجبي !!
:::::::::::::
مزيكا هاديه الكون فيها إنغمر
وصيف وليل وعقد فُل وسَمَر
يا هل ترى الناس كلهم مبسوطين
و يا هل ترى شايفين جمال القمر؟
عجبي!!
::::::::::::
إنشد يا قلبي غنوتك للجمال
و إرقص في صدري من اليمين للشمال
ما هوش بعيد تفضل لبكره سعيد
ده كل يوم فيه ألف ألف إحتمال
عجبي !!
::::::::::::::
آه لو أنا و محبوب جزنا الفضا
في سفينه وحدينا..وآشيا رِضا
ساعة صفا تعجبنا نرجع لها
و الهم قبل ما ييجي..يبقى مضى
عجبي !!
::::::::::::::

[karmen]

أنا إله الوجد رب الهيام
أضرب بسهم الوهم وهمّ الغرام
و همّ الغرام من كتر ما هو لذيذ
رشقِت أنا ف صدري جميع السهام
عجبي !!
::::::::::::::::::
حدوته عن جعران و عن خُنفِسه
إتقابلوا حبوا بعض ساعة مِسا
و لا قال لهم حد إختشوا عيب حرام
و لا حد قال دي علاقه متدنسه
عجبي !!
::::::::::::::::
ياللي عرفت الحب يوم و إنطوى
حِسَّك تقول مُشتاق لنبع الهوى
حِسَّك تقول مُشتاق لنبع الغرام
ده الحب..مِن داق منه قطره..إرتوى
عجبي !!
:::::::::::::::::
زحام و أبواق سيارات مُزعجه
اللي يطول له رصيف..يبقى نِجا
لو كنت جنبي يا حبيبي أنا
مش كنت أشوف إن الحياة مبهجه
عجبي!!
::::::::::::::::::
مرحب ربيع مرحب ربيع مرحبه
يا طفل ياللي ف دمي ناغا وحَبَا
علشان عيونك يا صُغنَن هَويت
حتى ديدان الأرض و الأغربه
عجبي !!
:::::::::::::::
إيديا في جيوبي وقلبي طِرِب
سارح في غُربه بس مش مِغتِرِب
و حدي لكن ونسان و ماشي كده
وبابتعد ما أعرفش..أو بأقترب
عجبي !!
:::::::::::::::::::
يا ميت ندامه ع القلوب الخلا
لا محبه فيها و لا كراهه ولا
حتى يا قلبي الحزن ما عادش فيك
معلهش..لك يوم برضه راح تتملا
عجبي !!
::::::::::::::

[karmen]

فتحت شباكي لشمس الصباح
ما دخلش منه غير عويل الرياح
و فتحت قلبي عشان أبوح بالألم
ما خرجش منه غير محبه وسماح
عجبي !!

:::::::::::::::::::::
غمست سنك في السواد يا قلم
عشان ما تكتب شعر يقطر ألم
مالك جرالك إيه يا مجنون..و ليه
رسمت ورده وبيت و قلب و علم
عجبي !!

:::::::::::::::::
أنا الذي عُمري إشتياق في إشتياق
و قطر داخل في محطة الفراق
قصدت نبع السم وشربت سم
من كتر شوقي وعشمي في الترياق
عجبي !!

::::::::::::::::
أنا الذي عشت الزمن مضيعه
بروح حزينه معفنه مضعضعه
زرعت شجرة سنط لجل أنجرح
لقيتها شعر البنت ومفرعه
عجبي !!

::::::::::::::::
لو فيه سلام في الأرض وطمان وأمن
لو كان مفيش ولا فقر ولا خوف وجبن
لو يملك الإنسان مصير كل شئ
أنا كنت أجيب للدنيا ميت ألف إبن
عجبي !!

::::::::::::::::
العشب طاطا للنسايم و نخ
أخضر طري مالهش في الحسن أخ
عصفور عبيط أنا..غاوي بهجه وغُنا
هنزل هنا..وإنشالله يهبرني فخ
عجبي !!

:::::::::::::::

[karmen]

أوصيك يابني بالقمر والزهور
أوصيك بليل القاهره المسحور
و إن جيت في بالك.إشتري عقد فُلّ
لأي سمرا..وقبري إوعَك تزور
عجبي !!

::::::::::::::::::
غمض عينيك وإرقص بخفه ودلع
الدنيا هي الشابه و إنت الجدع
تشوف رشاقة خطوتك تعبدك
لكن إنت لو بصيت لرجليك.تـقع
عجبي !!

:::::::::::::::::
حاسب من الأحزان و حاسب لها
حاسب على رقابيك من حبلها
راح تنتهي ولابد راح تنتهي
مش إنتهت أحزان من قبلها؟
عجبي !!

::::::::::::::::::
يأسك و صبرك بين إيديك وإنت حُر
تيأس ما تيأس الحياه راح تِمُر
أنا دُقت من دا ومن دا عجبي لقيت
الصبر مُر و برضَك اليأس مُر
عجبي !!

:::::::::::::::
ولدي نصحتك لمّا صوتي إتنبح
ما تخافش من جني ولا من شبح
و إن هَبّ فيك عفريت قتيل إسأله
ما دافِعش ليه عن نفسه يوم ما إندبح
عجبي !!

::::::::::::::::
ولدي إليك بدل البالون ميت بالون
إنفخ وطرقع فيه على كل لون
عساك تشوف بعينك مصيرالرجال
المنفوخين في الستره و البنطلون
عجبي !!

:::::::::::::::
خوض معركتها زي جدك ما خاض
صالب و قالب شفتك بإمتعاض
هي كده..ما تنولش منها الأمل
غير بعض صد ورد ووجاع مخاض
عجبي !!

::::::::::::::::

[karmen]

كام إشتغلت يا نيل في نحت الصخور
مليون بئونه و ألف مليون هاتور
يا نيل أنا إبن حلال ومن خلفتك
و ليه صعيبه علي بس الأمور
عجبي !!!

[karmen]

منين أجيبها كلمه متألمه
لعيبه فايره حايره ومُصممه
منين أجيبها كلمه تكون بنت أرض
تشفي اللي ما شافهوش كلام السمـا
عجبي !!!

[karmen]

أنا اللي بالأمر المُحال إغتوي
شُفت القمر نطيت لفوق في الهوا
طُلته ما طُلتوش إيه أنا يهمني
و ليه..ما دام بالنشوه قلبي إرتوي
عجبي !!

[karmen]

بره الإزاز كان غيم وأمطار وبرق
ما يهمنيش–أنا قلت–ولا عندي فرق
غيرت رأيي بعد ساعة زمن
وكنت في الشارع..وفي الجزمه خرق
عجبي !!!

[karmen]

عيني رأت مولود على كتف أُمُه
يصرخ تهنن فيه يصرخ تضُمه
يصرخ تقول يا بني ما تنطق كلام
ده اللي ما يتكلمش يكتر همه
عجبي !!!

[karmen]

أنا قلت كلمه وكان لها معنيين
كما بطن واحده و توأمين زي وشين
لو دنيا شر..التوأم الخير يموت
لو دنيا خير..الشرح يعيش منين
عجبي !!

[karmen]

يا عندليب ما تخافش من غنوتك
قول شكوتك وإحكي على بلوتك
الغنوه مش هتموتك إنما
كتم الغُنا هو اللي هيموتك
عجبي !!!

[karmen]

طال إنتظاري للربيع يرجع
و الجو يدفا والزهور تطلع
عاد الربيع عرمرم شباب
إيه اللي خلاني إبتديت أفزع ؟
عجبي !!!

[karmen]

و لو إنضنيت وفنيت وعُمري إنفرط
مش عاوز ألجأ للحلول الوسط
و كمان شَطَط وجنون مانيش عاوز
يا مين يقول لي الصح فين والغلط
عجبي !!

[karmen]

عاد الربيع كأنه طعم الحُب
و الحُب نار جوه العروق بتصُب
أتمتع إزاي بيه وأنا متقطع
من كُتر خوفي لا في الخطيئه يطُب ؟
عجبي !!

[karmen]

إزاي شبابنا يقوم وياخد دوره
من غير صراخ يئذيه و يجرح زوره
يا هل ترى أحسن له يقعد ساكت
أو ينترك ولو خرج عن طوره ؟
عجبي !!!

[karmen]

أحسن ما فيها العشق والمعشقه
وشويتين الضحك والتريقه
شُفت الحياه.لفيت.لقيت الألذ
تغييرها.وده يعني التعب والشقا
عجبي !!!

[karmen]

عجبي على العجب العجيب العُجاب
لمّا الحقيقه تطُل بعد إحتجاب
وتروح وتحلا وفجأه تصبح مفيش
كمثل طراطيش بحر ياما خد وجاب
عجبي !!!

[karmen]

في اللهو ماشي يا بهلوان إش إِش
يا فراشه منقوشه على كُل وش
شقلبت عقلي وعقلي شقلبني
وكنت بحسبني بقيت ما أندهش
عجبي !!

[karmen]

وقفت ساعة الصبح بغسل سناني
قالت لي شايف قوتي و لمعاني ؟
إيش تطلب اليوم مني ضحكة أسد ؟
واللا إبتسامة إعلانات أمريكاني ؟
عجبي !!

[karmen]

الحلو يم اليم صابح رايح
سارح في حُضن الميه سابح سايح
الحلو داب في البحر,قُلت أدوقه
وجدت لسه البحر برضك مالح
عجبي !!

[karmen]

يا كُل كلمه للعجب في قاموس
إنسكلوبيديا لسان العرب أو لا لاروس
تعالوا نجده.ده لسه في عصرنا
الشمس والبحر العريض بالفلوس
عجبي !!

[karmen]

ما إنتاش بتلعب ليه يا روح بابا ؟
و لا عسكري ولا لص في عصابه ؟
إلعب أسد أو ديب رهيب أو غزال
دي الدنيا في نهاية المطاف غابه
عجبي !!!

[karmen]

الموج تلول تهبط وتطلع تلول
يا بحر خدني الشط صاحبك ملول
و اللا بلاش الشط هعمل به إيه
ده ريحته طحلب مهري وأم الخلول
عجبي !!!

[karmen]

ورد في ورق سلوفان يا حلوه أهديلك ؟
و اللا أنقله بالطين في الشتله وأجيلك
الأولاني لو وحا بحناني
عجبي على التاني بإيه يوحيلك؟
عجبي !!

[karmen]

أنا قلبي كوكب وإنطلق في المدار
حواليكي يا محبوبتي يا نور ونار
يلف مهما يلف ما بيكتفيش
وتمللي نُصه ليل ونصُه نهار
عجبي !!

[karmen]

الأرض شوك أيوه لكن هايش
و الحُمره مش يعني الطريق حايش
دي دمنا السيال..وبُشرة خير
إن إنتي عايشه وإن كنت أنا عايش
عجبي !!!

[karmen]

إيه اللي خدته من مرور السنين
يا قلبي إلا دمعتك والأنين
بتئن وترجع وبتفرح وترجع تحن
مع إن مش كل البشر فرحانين
عجبي !!!

[karmen]

أوقات أفوق ويحل عني غبايا
وأشعر كأني فهمت كُل الخبايا
و أفتح شفايفي عشان أقول الدُرر
ما أقولش غير حبة غزل في الصبايا
عجبي !!!

[karmen]

عيني رأت مخلوق في غاية البشاعه
أنا قلت له لمّا تأملته ساعه
اللذه والموت علموك اللزج
وأنا علموني الفلسفه والشجاعه
عجبي!!

[karmen]

غطس وقب الموج نهود بمبي
من ألف جيل جميلات ما تعلم بي
يا قلبي عيب دول أمهاتنا القدام
أستغفر الله العظيم ربي
عجبي !!

[karmen]

علقت في المُسمار قناع مهزله
ومعاه قناع مأساه بحزنه إبتلا
بصيت لقيتهم يشبهوا بعضهم
وأهو ده العجب يا ولاد وإلا فلا
عجبي !!

[karmen]

ظهر المسيح الحي على سفح ربوه
و نزل بهالة الضي وقعد في قهوه
بصوا.تعالوا.قالوا خليه في حاله
الناس في حالهم يا بني..مالهمش دعوه
عجبي !!!

[karmen]

يا وردة قلبي معاكي في الريح لعب
لا تعبتي م الريح و لا قلبي تعــــــــب
احنا كده : نرتاح في صخب الجنون
و في السكون بنخاف قوي و نترعب
عجبي !!!

[karmen]

لولا اختلاف الرأي يا محـــــترم
لولا الزلطتين ما لوقود انضرم
و لولا فرعين ليف سوا مخاليف
كان بيننا حبل الود كيف اتبرم ؟
عجبي !!!!

[karmen]

مركب ورق من نفخة تتطـــــــــوح
ركبتها و الكل بيــــــــــــــــلوح
سوحت فيها اتنين و خمسين سنــــه
للآن ..... و لا بتغرق و لا تـــــروح
عجبي!!

[karmen]

عالجسر فت الصبح تحت الضباب
بين اللي لسه بينغرس و اللي طاب
ما اهتز قلبي لنبت طالع جديـــــــد
قد اللي ماشي .. وتحت باطه كتاب
عجبي !!

[karmen]

يا خالق الكون بالحساب و الجبر
و خالقني ماشي بلختيار و الجبر
كل اللي حيلتي زمزمية أمـــــــل
وازاي تكفيني لباب القــــــــــــبر؟
عجبي !!

[karmen]

قاعدة قناني الخمر ساكتة و ساهية
مع ابن آدم في الشبه متناهيـــــــــــة
مفيش كده روقان في لحظة تشوفهم
و بعدها بلحظه يودوا في داهيــــــه
عجبي !!!

[karmen]

حتة محارة وجدتها في يوم لقيـة
قالت لي شوف كيف الطبيعة شقية
نظرت للكهف اللي فيها و لقيــــت
إن الطبيعة كمان لا أخلاقيــــــــــة
عجبي !!!!

[karmen]

بلياتشو قال إيه بس فايدة فنونــــي ؟
و تلات وقق مساحيق بيلونونـــــــي
و الطبل و المزامير و كتر الجعـــــــير
إذا كان جنون زبوني زاد عن جنوني
عجبي !!!

[karmen]

نقطة مرارة كمان علي مشروبـــــــــــي
دوبها يا ساقي حسب مطلوبـــــــــــــــي
طعب الحياة .. مش برضه فيها و فيها ؟
ليالي وردي و نهارات خروبــــــــــــي ؟
عجبي!!

[karmen]

عيد و العيال اتنططوا ع القبـــــــور
لعبوا استغمايه .. و لعبوا بابــــــور
و باللونات و نايلونات شفتشـــــــي
و الحزن ح يروح فين جنب السرور
عجبي !!

[karmen]

الضحك قال يا سم ع التكشيـــــــر
امشير و طوبه وانا ربيعي بشيـر
مطرح ما باظهر بانتصر ع العدم
انشالله أكون رسماية بالطباشيــر
عجبي !!!!

[karmen]

أهوى الهوى و همس الهوى في العيون
وبسمة المغرم ودمعه الحنـــــــــــــــون
و زلزلات الحب نهد الصبـــــــــــــــــــــا
أكون انا المحبوب أو لا أكــــــــــــــــون
عجبي !!!

[karmen]

وسط الحطام اتفرجوا يا أنـــــــــام
تمثال ملك . و مبوله م الرخــــــام
لتنين نحتهم نفس أسطي الحجــــر
و كانوا ذات يوم كتلتين لسه خــام
عجبي !

[karmen]

يا ملونين البيض في شم النسيـــــم
لون الحنين و الشوق و خمر النديم
ما تعرفوش سايق عليكو النبــــــي
تلونوا الأيام بلون النعيــــــــــــــم ؟
عجبي!!

[karmen]

الدنيا صندوق دنيا .. دور بعــــد دور
الدكة هي .. و هي كل الديكـــــــــور
يمشي اللي شاف ويسيب لغيره مكان
كان عربجي أو كان امبراطــــــــور
عجبي !

[karmen]

قطي العزيز راقد على الكنبــــــات
في نوم لذيذ .. و بيلحس الشنبات
و انا كل عين فنجان مدلدق قلــق
صدق اللي قال إن الحياة منابات
عجبي !!

[karmen]

قالوا السياسة مهلكة بشكل عـــــــــــام
و بحورها يا بني خشنة مش ريش نعام
غوص فيها تلقي الغرقانين كلهــــــــــم
شايلين غنايم .. و الخفيف اللي عـــــام
عجبي !!!

[karmen]

سلام سلام سلام سلام ... سلام
كلام كلام كلام كلام ... كلام
هز الورق يا صاحبي كدهــــوه
يطلع كلام سلام .. و سلام كلام
عجبي !!!!

[karmen]

فوق تحت . ورا قدام . يمين شمـــال
في الجو . تحت الميه . أو في الرمال
طلب الكمال يحرم علي الممـــــــــكن
و الممكنات دول محرومين م الكمال
عجبي !!!

[karmen]

هات يا زمان و هات كمان يا زمان
غير بسمة الشجعان مامني يــــبان
هو اللي داق الفرحة يوم ثورتـــــه
يقدر يعود و لا ثانية للأحــــــزان ؟
عجبي!!

[karmen]

عبثا باقول واقرا في سورة عبس
ماتلومش حد إن ابتسم أو عبس
فيه ناس تقول الهزل يطلع جــــد
و ناس تقول الجد يطلع عبـــــث
عجبي !

[karmen]

يومي على الله تنتهي و تغيــــب
الشمس و تعود تاني يوم لهاليب
زي الحياة مأساه و من كترهــــا
بقي لا انتهاءها و ابتداءها عجيب
عجبي !!

[karmen]

علم اللوع اضخم كتـــــــــاب في الأرض
بس اللي يغلط فيه يجيـــــــــبــه الأرض
أما الصراحة فأمرها ســـــــــــــــــاهل
لكن لا ت*** المال و لا تصون العرض
عجبي !!!

[karmen]

قالوا ابن آدم روح و بدنه كفـــــــــــن
قالوا لأ بدن . قالوا لأ ده روح في بدن
رفرف فؤادي مع الرايات في الهــــــوا
أنا قلت لأ روح في بدن في وطــــــــن
عجبي !!!

[karmen]

أنا كان لي أب . و كان رئيس محكـــمه
ستين سنة .. في قضية واحدة أترمي
ستين سنة و طلع براءة و خــــــــرج
يشكي الحياة و الموت لرب السمـــــا
عجبي !!!!

[karmen]

الدرس انتهى لموا الكراريس
بالدم اللى على ورقهم سـال
فى قصـر الأمم المتــحدة
مسـابقة لرسـوم الأطـفال
ايه رأيك فى البقع الحمـرا
يا ضمير العالم يا عزيزى
دى لطفـلة مصرية وسمرا
كانت من أشـطر تلاميذى
دمها راسم زهرة
راسم رايـة ثورة
راسم وجه مؤامرة
راسم خلق جباره
راسم نـار
راسم عار
ع الصهيونية والاستعمار
والدنيا اللى عليهم صابرة
وساكته على فعل الأباليس
الدرس انتـهى
لموا الكراريس ..
ايه رأى رجـال الفكر الحر
فى الفكرادى المنقوشة بالدم
من طفل فقير مولود فى المر
لكن كان حلو ضحوك الفـم
دم الطـفل الفـلاح
راسم شمس الصباح
راسم شـجرة تفاح
فى جناين الاصلاح
راسم تمساح
بألف جناح
فى دنيا مليانة بالأشبـاح
لكنـها قلـبها مرتــاح
وساكتة على فعل الأباليس
الدرس انتـهى
لموا الكراريس …
ايه رأيك يا شعب يا عربى
ايه رأيك يا شعب الأحـرار
دم الأطـفال جايلك يحـبى
يقول انتـقموا من الأشـرار
ويسيل ع الأوراق
يتهجى الأسـماء
ويطـالب الآبـاء
بالثـأر للأبـناء
ويرسم سيف
يهد الزيـف
ويلمع لمعة شمـس الصيف
فى دنيا فيها النور بقى طيف
وساكتة على فعل الأباليـس
الدرس انتهى لموا الكراريس

[karmen]

احـنا العـمال اللى انقـتلوا
قـدام المصنع فى ابو زعبل
بنـغـنى للدنـيـا ونـتـلو
عناوين جرانـين المستـقبل:
"وحـدة صـف الأحـرار"
"جـبـهـة لكـل الثـوار"
"عـبور الجـيـش لسـينا"
"الـزحف مـن الأغـوار"
"جـيش العـدوان يتقـهقر"
"الأرض قــايـدة نــار"
"والبـحر قـايـد نــار"
"الاستـعمار أثـبت فشـله"
"البـيت الأبيض لا يخجل"
"إحـنا العـمال اللى انقتلوا"
"قدام المصنع فى أبو زعبل"
بـنـغـنى للدنـيا ونتـلـو
عنـاوين جرانـين المستقبل:
"محـكـمة للـمـجرمـين"
"قائــمة بالمـتـهـمـين"
"إدانـة مسـتر نيـكسون"
"بقـتل الاسـطى ياسـين"
"القــاتل اسـتـعـمارى"
"القـتـلـى وطنــيـين"
"عـمــال مـدنـيـيـن"
"نـصارى ومسـلـمـين"
"مرتكبو المذبـحة يعتـقلوا"
"الحـكم عـى المتهم الأول"
احـنا العـمال اللـى انقتلوا
قـدام المصنع فى ابو زعبل
بـنـغـنى للدنـيا ونتـلـو
عنـاوين جرانـين المستقبل:
"الجـو غــدا يتحـسـن"
"معرض لزهور السـوسن"
"الخطـة الخـمسية تنـفذ"
"مهرجانات النـصر غـدا"
"تصـفـية الصهـيونـية"
"دولـة فلسطين .. تعـلـن"
"دستور وقوانين .. تعـلـن"
"حريـة الدين .. تعـلـن"
"قوس تذكارى جارى عمله"
"طالين منه احنا وح نفضل"
احـنا العـمال اللـى انقتلوا
قـدام المصنع فى ابو زعبل
بـنـغـنى للدنـيا ونتـلـو
عناوين
جرانين
المستقبل

[karmen]

مرغم عليك يا صُبح مغصوب يا ليل
لادخلتها برِجْليَّا ولا كانلي ميل
شايلنِّي شيل دخلت انا في الحياة
وبكره ح اخرج منها شايلِّني شيل
عجبي !!

[karmen]

عجبي عليك .. عجبي عليك يا زمن
يا بو البِدَع يا مبكِّي عيني دَماً
إزاي أنا أختار لروحي طريق
وأنا اللي داخل في الحياة مرغماً
عجبي !!

[karmen]

سنوات وفايته عليّا فوج بعد فوج
واحدة خَدِتني إبن والتانية زوج
والتالتة أَب خدتني والرابعة إيه
إيه يعمل إللي بيحْدفُه موج لموج ؟
عجبي !!

[karmen]

وأنا في الضلام .. من غير شعاع يهتكه
أَقف مكاني بخوف ولا أتركه
ولما بيجي النور وأشوف الدروب
أحتار زيادة .. أيهم أَسلكه ؟
عجبي !!

[karmen]

نظرت في الملكوت كتير وانشغلت
وبكل كلمةْ ( ليه ؟ ) و ( عشانيه ) سألت
اسأَل سؤال .. الرد يرجع سؤال
واخرج وحيرتي أشد مما دخلت
عجبي !!

[karmen]

غَدْر الزمان يا قلبي ما لهوش أمان
وحاييجي يوم تحتاج لحبَة إيمان
قلبي ارتجف وسأَلني .. أَأَمِن بإيه ؟
أَأَمن بإيه محتار بقالي زمان
عجبي !!

[karmen]

كان فيه زمان سِحليَّة طول فَرْسَخين
كهفين عيونها وخَشْمَها بَرْبخين
ماتت .. لكين الرعب لم عمره مات
مع إنه فات بدل التاريخ تاريخين
عجبي !!

[karmen]

كل اللي في الخمّارة صابهم جنون
صبحوا الرجال يتبادلوا كاس المنون
وبْدمّ ونبيت انكتب ع الجدار
" يا ميت ندامة ع اللي قلبه حنون "
عجبي !!

[karmen]

يوم قلت آه .. سمعوني قالوا فَسَدْ
ده كان جدع قلبه حديد واتحسد
رديت على اللايمين أنا وقلت .. آه
لو تعرفوا معنى زئير الأسد
عجبي !!

[karmen]

قالوا الشقيق بيمُصّ دم الشقيق
والناس ما هيَّاش ناس بحق وحقيق
قلبي رميته وجبت غيره حجر
داب الحجر ... ورجعت قلبي رَقيق
عجبي !!

[karmen]

بين موت وموت .. بين النيران والنيران
ع الحبل ماشيين الشجاع والجبان
عجبي عَلادي حياة .. ويا للعجب
إزاي أَنا - يا تخين - بقيت بهلوان
عجبي !!

[karmen]

دخل الربيع يضحك لقاني حزين
نده الربيع على إسمي لم قلت مين
حط الربيع أزهاره جنبي وراح
وإيش تعمل الأزهار للميتين
عجبي !!

[karmen]

أنا قلبي كان شخشيخة أصبح جَرس
جلجلت به صحيوا الخدم والحرس
أنا المهرج .. قمتو ليه خفتو ليه
لا فْ إيدي سيف ولا تحت منى فرس
عجبي !!

[karmen]

مهبوش بخربوش الألم والضياع
قلبي ومنزوع م الضلوع انتزاع
يا مرايتي يا اللي بترسمي ضحكتي
يا هلترى ده وش والا قناع
عجبي !!

[karmen]

ليه يا حبيبتي ما بيننا دايماً سفر
ده البعد ذنب كبير لا يُغتفر
ليه يا حبيبتي ما بيننا دايما بحور
أعدي بحر ألاقي غيره اتحفر
عجبي !!

[karmen]

حبيت .. لكن حب من غير حنان
وصاحبت لكن صُحبه ما لهاش أمان
رحت لحكيم واكتر لقيت بلوتي
إن اللي جوّه القلب مش ع اللسان
عجبي !!

[karmen]

- الدنيا من غير الربيع ميّته
ورقة شجر ضعفانه ومفتفته
- لأ يا جدع غلطان تأمّل وشوف
زهر الشتا طالع في عز الشتا
عجبي !!

[karmen]

يا للي انت بيتك قش مفروش بريش
تقوى عليه الريح . يصبح مفيش
عجبي عليك حواليك مخالب كبار
وما لكش غير منقار وقادر تعيش
عجبي !!

[karmen]

حقرا وفوق كوكب حقير محتقر
في الكون تكون دنياكو إيه يا بَقَر
رملايه من صحرا ؟ .. لكين إيش تقول
والكون بحاله جوّه عقل البشر
عجبي !!

[karmen]

يا للي بتبحث عن إله تعبده
بحث الغريق عن أي شيء ينجده
الله جميل وعليم ورحمن رحيم
إحمل صفاته ... وانت راح توجده
عجبي !!

[karmen]

لا تجبر الإنسان ولا تخيّره
يكفيه ما فيه من عقل بيحيّره
اللي النهارده بيطلبه ويشتهيه
هو اللي بكره ح يشتهي يغيّره
عجبي !!

[karmen]

يا للي ف حماه الشمس تلقى الملاذ
وألف بكره وبكره ... في ضلوعه لاذ
مين انت ؟ مارد ؟ رب ؟ قال لأ ده بس
انا اللي باروي القمح واسقي الفولاذ
عجبي !!

[karmen]

البط شال عدَّى الجبال والبحور
ياما نفسي اهجّ ... أحج ويا الطيور
أَوصيك يا ربي لما أموت ... والنبي
ما تودّنيش الجنة ... للجنة سور
عجبي !!

[karmen]

غسل المسيح قدمك يا حافي القدم
طوبى لمن كانوا عشانك خدم
صنعت لك نعليك أنا يا أخي
مستني إيه .. ما تقوم تدوس العدم
عجبي !!

[karmen]

عيني رأت عصفور ووياه ابنه
بيحدفه في الريح وياخده ف حضنه
نوبتين وتالت نوبه - عجبي عليهم -
كانوا سوا بيرفرفوا ويغنوا
عجبي !