ازاى نقدر نشارك بالردود

[radwan]

ازاى تقدر ترد على موضوع؟

<اشكرك يا توتى على الموضوع الجامد ده واتمنى اشوف مواضيع جامدة تانى>

هو ده الرد عند معظم الاعضاء
متاخد copy-past
ومفيش جديد

ايه رأيكوا
ممكن نرد بشكل تانى؟

انا نفسى حاولت اخلى ردودى خفيفة
يعنى ساعات بحاول اهزر شوية فى الرد
يمكن بعض الاعضاء بياخد الهزار ده على انه تريقة عليه مثلا
بس بجد عمرى مقصدت حاجة زى كده خالص

انا بحترم كل عضو هنا فى المنتدى


وطبعا فى اعضاء بعتتلى رسايل تهديد بالاغتيال
اقصد..........

اظن الكلام ده يكون بيننا
مش على العام
المهم انا كنت عايز اعرف اراء الاعضاء


ازاى اقدر ارد على موضوع من غير ما يحصل تكرار للردود او انها تكون ممله
مستنى ردودكوا

[radwan]

آه
نسيت اطلب من الادارة التثبيت
ده بعد اذنكوا طبعا

[radwan]

ممكن اطلب من الادارة وضع الموضوع على المنتدى العام حتى يتم التفاعل من قبل الاعضاء
ولو لبضعة ساعات

[night_fox]

ممكن اتدخل؟
لو ممكن انا هقولك رايي
اساسا انت فاهم يعنى ايه رد؟؟؟
الموضوع من اساسه يعنى ايه منتدى؟؟؟
منتدى يعنى مكان نتجمع فيه
ونعرض مواضيع
المواضيع دى عبارة عن مشاكل بتقابلنا
او حاجات موجوده فى المجتمع وبناخد اراء الناس
علشان نشوف احنا ممكن نعمل ايه علشان نواجه الحاجة دى
ومن ناحيه تانيه
نتعرف على اصدقاء
ونعمل علاقات صداقة
اما بقى حكاية رد دى
انت المفروض بتشوف الموضوع
وتقراه
وتقول رايك
ولو عندك حل تشارك بيه
اكيد بتشوف فى المنتدى ردود بتبقى فيها كلمة واحدة
مشكوووووووووووووووووووووووووووور
اكيد
ده بيبقى واحد مثلا معندوش راى
او ممكن يكون مش واثق فنفسه
فبيقول مشكور وخلاص
بس فيه قاعدة بتقول
من قال لا اعرف فقد افتى
يا ريت اكون قدرت اوصلك كلامى
واكيد مش انا لوحدى اللى صح
او ممكن اكون مش صح خالص
لو حد شاف كده
يارييييت يوجهنى
شكرا واسف لو كنت طولت عليك
تحياتى للجميع

[radwan]

مشكوووووووووووووووووووووووور
طبعا مش هقلها
انا معتز جدا انك شاركتنى موضوعى
بس تتخيل انه مش ممكن نعمل ضوابط للردود على سبيل المثال؟
مش واصله برده ليه
هل انت من بتوع مشكور ولا ليك رأى تانى
اكيد ليك راى هتقولهولى

[Silver]

أتابع من على الدكة ،،،

ولى تعليقى فى آخر الموضوع

[الماجيك]

أهم حاجة الهزار يكون مقبول

ومش كل حاجة هزار

يا ابو الهزار ال.....

[eltohamy]

فعلا هو ده الكلام

بس ساعات كلام شكرا بتنفع وبتشجع الواحد

بس لو فى تعليق فى صيغه الموضوع بيشجع اكثر واكثر

تحياتى

[radwan]

يعنى انتوا شايفين ان العضو ممكن يرد بهزار او يخلى رده خفيف بحيث انه ميجرحش
صاحب الموضوع؟
ولا انه يقول مشكووووووور وخلص الموضوع

انا نفسى محتار
محتار مش مختار

[الفرعون المدمر]

هل من حقي أرد بأضافة أساس
تبليغ عن شعور
الرد معناه انك تقول رأيك في الموضوع
دون تجريح صاحب الموضوع

[radwan]

طبعا ليك حق المشاركة
معتز جدا بمشاركتك

[radwan]

استنيت كتير على الدكة
بس مسمعتش الرد اللى كنت مستنيه
اظن انها مش نفس الدكة

[Silver]

استنيت كتير على الدكة
بس مسمعتش الرد اللى كنت مستنيه
اظن انها مش نفس الدكة


لا تعتبر تأخرى فى الرد إهمال

بس أنا بتابع كل مشاركاتك الأخيرة

وأظن أنه فى تحسن فى مشاركاتك

وخاصة لو كان فيه نقاش أو جدال حول موضوع ما

ياريت تستمر على كده ... وتقلل من الهزار إلى حد ما

وبالله التوفيق

[radwan]

اكيد
واشكرك على الاهتمام

[prince of alex]

تعليقا على كلامك

فانا اظن انك كلمة مشكور اوتسلم او حتى thx

تكفي في كثييييييييير من الاحيان وكمان عايز اعلق على حكاية الرد الي يكون في هزار شوية

انا اعتقد انه لازم يكون في الموضوع ده لكنـ

اكتتتتتتتتتتتتتتتتر الي معانا عـ المنتدى بيقعدوا عـ الوحدة

ومستنين رد زي كدا او مثلا رد زي مفهمتش

عشان يعملوا حوار

وده طبعا طبيعة عندنا ( العرب ) مستحيل تتغير

وانا عارف ابل ما اكتب الكلام ده ان عيثير غضب كتيييييييير من الناس هنا

بس اتمنى انهم يخدوا رأي من غير سلبيه

انا عايزهم يشوفوا ان الرد الي انا كاتبه نقد ممكن يكون بناء

ويشوفوا السلبيات الي انا ذكرتها ويحولوا يرجعوا نفسهم تاني

سلامي ليك

[THE KING]

والله يا رضوان .. تسلم إيدك على الموضوع الهايل ..
وانت فتحت باب للحوار فى الموضوع ده بالذات .. بس يا رضوان كل اللى بتقوله مظبوط ..
بس فى مواضيع بتكون تافهه جدا ..
يا اما تهزأ صاحبها يا إما تكتفى بكلمة شكرا ..
ويامعلم أقل حاجه نحية موضوعك إنه يتثبت
وتم التثبيت يا معلم ..

[radwan]

شكرا عمور التثبيت

الموضوع ده من زمان جدا

لكن فعلا موضوع مهم لازم الواحد ياخد باله منه كويس

[karmen]

اشكرك يا توتى.....أوه سورى قصدى يا رضوان
على الموضوع الجامد ده واتمنى اشوف مواضيع جامدة تانى
ههههههههههه
ايه رأيك فى الرد ده
عالعموم يا سيدى أنا بصراحه مش مع كلمة شكرا وخلاص
لازم كده يكون فيه روح فى المناقشه بين الأعضاء
يعنى مينفعش أقول مشكور وخلاص على كده
والموضوع اللى ميستحقش غير كلمة مشكور لازم برضو أضيفله شوية كلام من عندى
بصوا كلمة مشكور بتدل الى حد ما على عدم الاهتمام
وساعات بتفهم صاحب الموضوع انك مقريتش الموضوع أصلا وداخل تكتب مشاركه وخلاص
لكن لما تتناقش وتتكلم وتعلق ده فى حد ذاته كويس جدا
بيخليك محبوب بقدر ما انت مهتم بالناس
وده رأى علم النفس
حاول تبقى فعال وتثبت نفسك من خلال أسلوبك فى الكلام والتعامل مع الآخرين

[radwan]

توتى؟؟؟
نعم؟؟؟؟؟؟؟؟؟؟؟؟؟؟؟؟
هههههههه
ماشى يا كارمن
أكيد يا كارمن
لازم نقرأ الموضوع ونشارك بجد
ولو مش عايزين نشارك يبقى كفايه المشاهده

شكرا ليكى كارمن على الزياره

[karmen]

شكرا ليك انت عالاستضافه بس معلش نسيت اجيب معايا اتنين كيلو قشر موز وكيلو قشر برتقان
المره الجايه بقى

[radwan]

ومتنسيش تجيبى الشاى والسكر وشمعه نعمل عليها الشاى
ويا ريت المجّات

ومش هنكلفك حاجة
الميه موجوده الحمد لله

[karmen]

أكيد طبعا أمال ايه
وبالذات الشمعه اللى هنعمل عليها الشاى

[radwan]

أه طبعا
ومتقلقيش من الباقى
زى ما قولتلك الميه موجوده

[mahmodsalama]

انك ترد علي الموضع بكلمة شكرا دا شيء جميل لاكن الاجمل ان الواحد يعلق تعليق محترم

[prince of alex]

طب والله انت انسان محترم

[mahmodsalama]

شكرا يا باشا جدا