امشى معايا وحدة وحدة
ماشى انت واصحابك فى الشارع ومهيص
وأدامكوا بنت محترمة ماشية فى حالها
وأصحابك يا جميل قاعدين يعاكسوها زى مانتا عارف

قولى انت بقا هتعمل ايه

هتعاكس ولا هتنصح صحابك ولا هتزعل من صحابك وتمشى؟

مع انك معروف انك صايع

مستنى مشاركتكم

شكرا لمروركم
بلابل وأسامة

ربنا يهدى كل شباب وبنات المسلمين يا على
وياريت الشباب يبطلوا معاكسه بقى
عشان فعلا المعاكسه دى شئ مقزز ومقرف وبيضايق البنات على فكره مش بيبسطهم زى ما الناس متخيلين
البنت بيبقى نفسها تمشى فى الشارع براحتها متحسش ان عيون الناس كلها عليها ومراقباها
وبصينلها بصات فيها شهوه حقيره

بصراحة كل اصحابي محترمين شكرا لفكرتك الجميلة

بصى يا كارمن البنت ال محتمرة صدقينى محدش هبصلها أبدا لو لابسة لبس محترم مغطيها ومش حجات ضيقة
زى ال بنشوفه اليومين دول
يعنى انتى عايزة واحدة تلبس بنطلون ضيق مبين ال جوة ومش عايزاها تتعاكس
لكن لو لابسة عباية محتشمة او بنطلون واسع صدقينى الشباب مش هيفكروا يضايقوها دا بالعكس هيحترموها أوى

شكرا ع مروركم

بص يا علي
طبعا انا معاك ان المفروض البنات متلبسش ضيق وقصير ويبين جسمها
بس ده برضو مش مبرر للشباب انهم يعاكسوها
أنا حره
كل بنت حره
ألبس اللى انا عاوزاه ملبسش اللى انا مش عاوزاه
لكن انت مجبر انك تحترمنى في كل الأوقات
طالما مشفتنيش نايمه في حضن واحد واللا بعمل حاجه غلط ومخله يبقى ملكش تحاسبنى
اللبس ده بيعكس ثقافه مش أكتر
يعنى أيا كان نوع اللبس فمش غلط
الحاجات الغلط كلنا عارفينها بإختلاف ثقافاتنا وبيئاتنا
بمعنى
لما أغلط مع شاب
الفعل ده خطأ عند كل الثقافات والمجتمعات الشرقيه
سواء بقى الهاى كلاس أو اللو كلاس أو الطبقه المتوسطه
لكن لما ألبس مثلا جيبه قصيره الفعل ده مش غلط عند كل الناس
يبقى طالما أنا محترمه ملكش دعوه بلبسى
حتى لو مش محترمه
انت مالك برضو تعاكسنى ليه
تضايقنى ليه
مين إداك الحق ده
مين قالك ان ده من حقك انك تتضايق فى خلق الله أيا كانوا هما عاملين ايه فى نفسهم
طبعا الكلام مش ليك انت يا علي
ده عامة
وسورى انى انفعلت
بس فعلا حاجه تغيظ
الولد المحترم لو حطوه وسط مليون بنت ان شالله مش لابسين خالص
هيفضل محترم برضو
مبيتحججش بالظروف غير الولاد الواقعه المسقطين

أنا معاكى فى النقطة دى
انا مش بتكلم على الشباب المؤدب انا بتكلم على الشباب الخربان
انه لما يلاقى واحدة زى ال كلمت عنها حكمه انها زيه فى قلة الأدب
هو ملوش دعوة مؤدبة ولا مش مؤدبة
المهم ال هو شايفه أدام عنيه وده طبعا ع الشباب البايظ
أما الشاب المحترم بيحترم نفسه فى اى مكان

هديكى مثال:
لو واحد مش عايز يدخن مش هيمشى مع المدخنين
يبقى لو بنت مش عايزة تتعاكس متمشيش باللبس ال بيخليها تتعاكس

اوكى انا عارف ان هى حرة وممكن تكون محترمة اكتر من ال لابسة لبس مغطيها
بس الشباب بيبص بطريقة غير ال انتى بتفكرى بيها

معلش يا كارمن لو بتكلم جامد شوية
بس انا فعلا بتضايق لما الاقى اى بنت بتتعاكس ولما اجى اعاتب الشاب ده
يقولى يا عم شوف هى لابسة ايه الاول

تحياتى